At Orkdal er ei bygd med stor interesse og sterkt engasjement for misjon, det er vide kjent. Det er mange misjonærar som er utreist herifrå, og det blir halde mange møte med misjon som tema den dag i dag. Og i november har vi kvart år ei julemesse som totalt gir over 200 000 kroner til Misjonssambandets arbeid.

Den første misjonsforeninga starta for 150 år sia! Den 8. juni 1856 samlast det mange menn frå heile bygda på garden Stokkan og stifta Ørkedals Missionsforening. Eigentleg starta det heile med eit møte i prestegarden 3. juli i 1847 der 14 ”bønder og skoleholdere” møttest, men dette skal vi feire 160-årsminne for neste år! Protokollen frå 1857 har eg oppbevart her i prestegarden. Formålet var å medverke til kristendommens fremme og utbredelse til alle folkeslag. Det vart lese om misjonsarbeidet i Sør-Afrika, og det vart lagt gåver i misjonsbøssa. Det var song og bønn på alle møte. Planen var å halde misjonsmøte i alle grendene i bygda.

Interessant er det at denne foreninga også hadde møte for israelsmisjon frå 1867 og for santalmisjon frå 1884 og omkring hundreårsskiftet var det også støtte til misjon mellom sjøfolk og ”lappemisjon” dvs sjømannsmisjon og samemisjon.

Ordførar i det første styret var prost Bull, ellers finn vi desse namna blant stiftarane: Thomas Johnsen, M. Sivertsen, A. Hagen, Erik S. Sølberg, Paul Vinterdal, John Quikne, Erik S. Solhus. Det var berre menn som deltok til å begynne med, men Grøtte kvinneforening vart starta i 1862 .

Den årlege inntekta til misjonsarbeidet vatr 30 kroner det første året, men steig til 3000 kroner 50 år etterpå. Ved jubileet i 1906 blir det nemnt at det var gitt 50 000 kroner til misjonen frå denne foreninga på 50 år. A. Vormdal avsluttar 50-årsmeldinga slik i 1906:

I det lange tidsrum har foreningen været forskaanet for oprivende splid og strid. Prester og lægfolk har arbeidet sammen i broderlig fortrolighed og endrægtighed. Den i de senere aar indtrængte splid som der klages over fra mange kanter af vaart land har ikke faaet indpas her. Maatte det gode forhold, som hidtil har hersked mellom lækfolk og prester her i menigheden alltid vedblive til glæde og velsignelse for alle.”

Ved 70-årsjubileet i 1926 er det lærarinne Anne Muhle som skriv jubileumsmeldinga. No har kvinnene tatt over. ”Et mindre gledelig faktum er det, at mens kvinnene fremdeles holder sine møter i gang, har mennene sluttet sine; tilbake er kun årsmøtet med bøssetømming. Gud gi sin Ånd i rikt mål over Orkdal misjonsforening!”

Ved 90-årsjubileet i 1946 kommenterer Anne Muhle den vanskelege tida under krigen. Misjonsforeningane samla inn pengar til misjonen i smug. Det var aldri på tale å slutte. ” … folkeferd bruste, riker rokkedes, kun Herrens trofaste ord og løfter er de samme. Det viser seg alltid på nytt at lydighet mot Gud bringer velsigning med seg, men tross og ulydighet drager forbandelser og ulykke ned over synderen.”

Vi vil feire 150 år med misjon i Orkdal med ein stor misjonsfest i Stokkhaugen bedehus. Det blir song og musikk og servering, og det blir innslag frå misjonærar frå Misjonssambandet og Misjonsselskapet som bur i Orkdal. Oddbjørn Stjern og andre orkdalsprestar deltar. Alle er velkomne!

Birger Foseide

Stokkhaugen bedehus

www.orkdalsmenighetene.no

Redaktør, design og layout:
Sokneprest Pål Ove Lilleberg Mail